_< دروس (1) الأليستريتر >_ [الأرشيف] - منتديات الدوادمي نت

باريس

27 / 07 / 2008, 22 : 09 AM

السلام عليكم د4 ..

كيف الحال جميعاً ..

صيفكم دوادمي مع الأسرة النارية .. :) ..

بسم الله نبدأ ..

أولاً .. برنامج الأليستريتر , هو برنامج رسم مُخصص للرسم سواءاً رسم الأشكال, أو رسم الكلمات ( الخط الحرّ ) ..
وهو مثل برنامج الرسّام اللي موجود في الميكرسوفت , بس أنه يُعتبر نسخة متطورة جداً جداً جداً جداً د4 ..
بحيث إن فيه العديد من الخصائص اللي تمكنك من الرسم بطريقة سهلة جداً ..
ويُعتبر من أهم وأشهر برامج الأدوبي ..

عند تحميل الملف وتنصيبه ..
ومن ثمّ تشغيل البرنامج , أول ما يفتح لك البرنامج تظهر لك هالرسالة مباشرة :

http://al-dawadmi.com/upload/uploads/2322ecf528.gif (http://al-dawadmi.com/upload/)

وهذي المقصود فيها خصائص طاولة العمل اللي تبي تعمل عليها ..

وضعت أنا رقمين حول الشغلتين اللي بإمكانك تغيرّها , اما الباقي اجعله كما هو الإفتراضي ..

عند الرقم واحد , يخيّرك إذا كنت تبي طاولة عملك , أو صفحة طاولة عملك بشكل طولي أو عرضي , وأعتقد إنها واضحة من الصورة ..

وعند الرقم أثنين , يقصد بها صيغة الألوان المستخدمة ..
الإفتراضي راح يطلع لك على الـ CMYK .. بس أنت حوّله إلى RGB ..
لأني مرة تزعبلت بسبة ذي , لما كتبت كلمة ورسمتها صار لي ساعة عليها ثم نسختها ووديتها الفوتوشوب , تحوّلت خيارات الفوتوشوب لخيار الـ CMYK وصار ما يقدر يحفظ الصورة بصيغة gif .. وتعبت بسبتها وبالأخير عرفت المشكلة :( ..

أول ما تسوي هالخيارات وتضغط موافق .. تبدأ الآن بمشروعك اللي من المقرر تسويه د4 ..

طبعاً بأحاول إني أخليّ دروس الخط الحرّ , او الرسم عن طريق الفيديو .. لأنه من الصعب جداً أخليه بالصور :( ..
ويمكن يكون فيه توضيح داخل الفيديو لبعض الأمور ..

يتبــــع الدرس ..

باريس

27 / 07 / 2008, 49 : 09 AM

أول أهم القوائم في البرنامج :

http://al-dawadmi.com/upload/uploads/212580e305.gif (http://al-dawadmi.com/upload/)

رقمّت أهم الأيقونات الموجودة في القائمة , واللي يحتاجها سواءاً المبتدأ أو حتى المحترف , ولو إن المحترف يحتاج لبعض الأيقونات وبالنسبة له مهمة .. بس اللي أنا رقمتها تفي بالغرض وتؤدي إلى نتائج جميلة جداً د4 ..

نبدأ مع الأيقونات وشرحها :

1- بالنسبة للسهم الأبيض , هذا له فائدة عظيمة جداً في الرسم , لأنه مخصص لتحديد النقط ( النقاط بتعرفونها لاحقاً ) , بس بأشرح فكرة النقاط على شكل سريع .. لما يكون عندنا شكل مُربعّ مثلاً , يكون له أربع نقاط , عند كل زاوية فيه نقطة , هالنقطة هذي ما أقدر أحددها إلا بالسهم الأبيض , إما بالضغط على أحد زوايا المربع , أو بعمل تحديد حول الزاوية نفسها , وقتها راح تظهر الأربع نقاط حقة المربع لونهن أبيض , إلا هالنقطة اللي حددتها يصير لونها أزرق .. ووقتها بإمكانك تحرّك النقطة نفسها بالمكان اللي تبيه , وتخليّه بدال لا يكون شكر مربّع , يطلع شكل متوازي أضلاع أو تخليه مثلث بوضع النقطة في منطقة تجعل من الشكل مثلث د4 ..
طبعاً فوائدها في الأمور الإحترافية أهم وأكبر , بحيث لو رسمت لك شكل , او رسمت كلمة , بيتواجد في الكلمة أكثر من عشرين نقطة , عند كل تعرّج فيه نقطة . وقتها بامكانك تعديل التعرّجات عن طريق تحديد النقطة المتواجدة في مكان التعرّج ومن ثمّ تحريكها لمكانها الصحيح اللي يجعل من الشكل متساوي ومتناسق د4 ..

2- السهم الأسود , هذا مخصص للتحديد الكامل , والتحريك .. يعني بمجرد أنك تضغط على شكل أو على خط بالسهم الأسهم , بتلاحظ مباشرة أنه تحدد , وبإمكانك تحريك الشكل كامل , أو قصّه , أو تكبيره أو تصغيره , ويختلف من ناحية العمل عن السهم الأبيض إختلاف شاسع ..

3- رقم ثلاثة ذي تُعتبر أول أهمّ أيقونه في البرنامج كلّه .. لأنها هي اللي تكتب بها الخط الحرّ , وعن طريقها أيضاً تقدر ترسم , ولها طريقة إستخدام عجيبة , ومرونة في الإستخدام أعجب ..!
تختلف كثيراً عن طريقة إستعمالها في الفوتوشوب , اللي موجودة في الفوتوشوب تحسّونها محدودة الصلاحيات , بس هذي في من المرونة الشيء الكثير .. وراح يكون لها هي وأيقونه ثانية شرح مفصل وطريقة إستخدام لأنها لبّ الموضوع .. المهم احفظوا شكلها ..

4- أعتقد واضحة من شكلها , هي مخصصة للأشكال ,سواءاً المربع أو الدائرة أو النجمة .. إلخ ..
وتفيدك في بعض الرسومات ..

5- هذي تُعتبر ثاني أهمّ أيقونه بعد الرقم ( 3 ) .. لأنها أيضاً تستخدم بكثرة في كتابة الخط الحرّ , وهي بمثابة الفرشاة الموجودة في الفوتوشوب , إلا أنك بالأليستريتر تستخدمها على أنها قلمّ , وهي بالأصل فرشاه , بإمكانك رسم الشكل اللي تبيه , او الكلمة اللي تبيها , وبعد إنتهائك من الرسم بتحصلّ إن كل منطقة في رسمك تحولّت لنقطة , بإمكانك تحريكها وتعديلها في السهم الأبيض اللي ذكرناه سابقاً , وهالأيقونه راح يطول عليها الكلام , ولكذا راح أؤجلها مع أختها رقم ( 3) .

6- هذي لها خاصية حلّوة , وهي إنها تسمح لك بعد ما تحدد الشكل اللي تبيه , أنك تزيد في حجمه وتخليه أكبر شوي , أو تقللّ من سمكها , أو أنك تقلبها , بدال لا تكون شكلها متجهه لليسار , تطلع متجهه لليمين , وبمجرد أصلاً تجريبك لفائدتها بتستنتج كل شيء عنها , وتفيدك جداً في بعض الأمور , وبالضغط المتواصل عليها يخرج لك من عند السهم الصغير اللي تحت أيقونه ثانية داخلة معها , بالضغط على الأيقونه الثانية تجد خصائص أخرى , وتعطيك المجال لتزيين الكلمة اللي رسمتها من حيث ميلانها بشكل معين .. وأيضاً بعد تجريبها راح تلحظون فائدتها .. د4 ..

7- رقم سبعة مخصصة للتدوير , تدوير الشكل , بعض الأحيان الرسم يلاحظ ميلان في منطقة معينة رسمها , بإمكانه تدويرها لين تتناسق مع الشكل ,بس بشرط تكون هالمنطقة مستقلة , يعني ماهوب جزء من مربّع تحدده وتبي تدورّه ؟ لا .. لو فرضاً رسمت مربع وبجمبه مثلث ووراهم دايرة , ولاحظت إن المثلث مايل شوي , أقدر أضغط عليه بالسهم الأسود اللي شرحناه تو , ثم نروح لأيقونة التدوير , وندورّها شوي لين تتعدل مع الشكل د4 ..
وتلاحظون أيضاً السهم الصغير الأسود تحت الأيقونه , هذا بالضغط عليه تطلع أيقونة أخرىأيضاً .. وظيفتها تحويل جانب الشكل من جانب إلى آخر . د4 ..

8- هذي الأيقونة لها وظيفة حلوة , وهو التعديل على خطوط الشكل أو الرسمة .. فمثلاً أنا كتبت كلمة باريس ولاحظت إن حرف الراء ماهوب متناسق مع الكلمة , بالإمكان بعد الضغط على هالأيقونه أجي عند المنطقة اللي أحسّ فيها ميلان بسيط , وأحركّها لين تتعدلّ .. طبعاً التحريك له أسلوب , فلو كان الميلان خارجي , يعني كأن فيه بعج بالحررف , يصير تحريكي للداخل .. وإن كان كأن الميلان داخلي , أصير أجرّها للخارج لين تتمدد خطوط الشكل معي شوي لبرى وتتناسق مع الكلمة د4 ..

9- هذي علبة الألوان .. وأي شكل تسويه أنت يتلوّن فيه مكانين , الجسم والحدود ..
يعني مثلاً لو سوينا مربّع .. راح يكون فيه بالداخل اللون الأبيض , اللي هو على اليسار , وراح تكون الحدود بالأسود , اللي هي على اليمين , لذلك خلك متفطن لها , لانها تختلف عن الفوتوشوب من هالناحية ..
هاللونين أساسيين , ماهوب واحد اساسي والثاني ثنوي , لا .. كلهم أساسييّن , وكل وحدة لها أختصاصها ..
اللي تجي على اليسار خاصة بالجسم , اللي هو داخل الحدود , واللي على اليمين خاصة بالحدود ولونها ..
وراح نشرحها أيضاً لاحقاً ..
يبقى أن أشير إلى الشكل اللي تحت علبة الألوان .. اللي مربع أبيض عليه خط أحمر .. هذا لما تكون تبي خلفية المربع مثلاً بدون لون .. بس تضغط عليها ومباشرة تختفي خلفية المربع ..
بس بشرط .. أنك تكون بالأول مخليّ الشكل اللي على اليسار هو البارز .. ومن ثمّ تضغط على المربع اللي عليه خط أحمر , وبتختفي معك الخلفية ويصير حدود بدون جسم د4 ..

إلى هنا أتوقفّ ..

ولي معكم لقاء قريب جداً :) ..

وبالتوفيق جميعاً ..